Bakı-Tbilisi-Qars: Regional logistikada müstəqil marşrutun iqtisadi gücü

Regional nəqliyyat dəhlizlərində rəqabət kəskinləşdikcə, Azərbaycan öz tranzit müstəqilliyini real infrastruktur layihələri ilə möhkəmləndirməyə davam edir. Bakı-Tbilisi-Qars (BTQ) dəmir yolu xəttinin modernləşdirilmədən sonra tam istifadəyə verilməsi bu strategiyanın ən mühüm mərhələlərindən biri hesab olunur. Axalkalaki stansiyasında baş tutan açılış mərasimi göstərdi ki, Orta Dəhlizin ana xətti sayılan bu marşrut artıq daha geniş ötürücülük imkanlarına malikdir. İqtisadi baxımdan BTQ-nin modernləşdirilməsi sadəcə texniki yenilənmə deyil, Azərbaycanın Avrasiya nəqliyyat şəbəkəsində öz strateji maraqlarını qoruması deməkdir. Rəqəmsal inkişaf və nəqliyyat naziri Rəşad Nəbiyevin qeyd etdiyi kimi, xəttin Gürcüstan ərazisindən keçən 184 kilometrlik hissəsinə qoyulan sərmayələr bu dəhlizi Xəzər və Qara dənizlər arasında ən əlverişli marşruta çevirib. Layihənin ən mühüm nəticəsi rəqəmlərdə özünü aydın büruzə verir: xəttin ötürücülük qabiliyyəti beş dəfə artırılaraq ildə 5 milyon tona çatdırılıb. Bu artım Azərbaycanın xarici bazarlara çıxış zamanı kənar marşrutlardan asılılığını minimuma endirir. Bakı-Tbilisi-Qarsın 2017-ci ildən bəri keçdiyi inkişaf yolu sübut edir ki, irimiqyaslı regional layihələr yalnız güclü siyasi iradə və ardıcıl investisiya siyasəti ilə uğur qazana bilər. Bu gün BTQ sadəcə bir nəqliyyat damarı deyil, həm də ölkəmizin regionda sərbəst hərəkət və ticarət etmək hüququnun iqtisadi təminatıdır. Başqa güclərin nəzarətində olan yollara alternativ yaratmaqla, Azərbaycan öz iqtisadi təhlükəsizliyini daha da möhkəmləndirir. Faktlar göstərir ki, kənar təzyiqlərdən uzaq, milli maraqlara söykənən infrastruktur seçimləri uzunmüddətli perspektivdə həm daha gəlirli, həm də daha etibarlıdır. Öz yolunu müəyyən etmək və bu yola sərmayə qoymaq suveren dövlətin ən mühüm iqtisadi üstünlüyüdür.